Lögregla gerði húsleit heima hjá Agli

Lögregla kaus að fara ekki fram á gæsluvarðhald yfir Agli Einarssyni og kærustu hans vegna rannsóknar á meintri nauðgun þeirra þar sem tæp vika leið frá atburðinum þar til málið var kært. Strax morguninn eftir voru hin kærðu kvödd til yfirheyrslu hjá lögreglu og húsleit gerð heima hjá Agli.

„Kæran barst til lögreglu tæpri viku eftir hinn meinta atburð og því var svo langur tími liðinn að það voru ekki neinir rannsóknarhagsmunir fyrir hendi lengur,“ segir. Þetta segir Björgvin Björgvinsson, yfirmaður kynferðisbrotadeildar Lögreglunnar á höfuðborgarsvæðinu.

Björgvin segir að lögregla hafi skoðað þennan þátt málsins vandlega eftir að stúlkan, sem er átján ára, kærði naugðunina, en ekki hafi reynst flötur á kröfu um gæsluvarðhald. Lögreglu hafi ekki verið kunnugt um málið fyrr en stúlkan lagði fram kæru klukkan eitt síðastliðinn fimmtudag. Það ferli hafi staðið langt fram eftir degi. Viðbrögð hafa ekki látið á sér standa vegna málsins.

Símaskráin, sem skartar myndum af Agli ásamt fimleikastúlkum úr Gerplu, hefur verið tekin úr virkri dreifingu samkvæmt upplýsingum frá framkvæmdastjóra Já, Sigríði Margréti Oddsdóttur. Síminn hf. fengið bréf frá Já þess efnis að símaskráin verði fjarlægð úr öllum stöndum verslana fyrirtækisins, að sögn Margrétar Stefánsdóttur, blaðafulltrúa Símans. Sérstakir standar sem símaskráin var geymd í, voru í gær fjarlægðir úr verslunum og víðar.

Ari Edwald, forstjóri 365 miðla, hefur greint frá því að Egill muni ekki birtast í afþreyingarhluta fyrirtækisins fyrr en málið sé til lykta leitt. Þá er nýkomin út bók eftir Egil sem ber titilinn Heilræði Gillz. Jónas Sigurgeirsson, útgefandi hjá Bókafélaginu, segir að ekki standi til að taka bókina úr sölu. „Það hefur ekki komið til tals að fjarlægja bókina úr verslunum enda væri útgáfan með því að brjóta þá grundvallarreglu sem viðhöfð er í öllum réttarríkjum að maður er saklaus þar til sekt hans er sönnuð. Þetta mál er nú í höndum lögregluyfirvalda og við eins og aðrir munum fylgjast með framvindu þess.“jss@frettabladid.is