Stuðningsmenn skotnir og þjálfari fékk hjartaáfall

Tveir stuðningsmenn brasilíska liðsins Palmeiras urðu fyrir skotum eftir átök brutust út milli stuðningsmanna og lögreglu í tengslum við leik liðsins gegn Corinthians í gær. Þá var Ricardo Gomes, stjóri Vasco da Gama, lagður inn á sjúkrahús eftir að hafa fengið hjartaáfall.

Palmeiras vann nokkuð óvæntan 2-1 sigur á Corinthians en skotárásin setti svartan blett á sigurinn. Stuðningsmennirnir voru lagðir inn á sjúkrahús en ekki er vitað um ástand þeirra.

„Við vitum ekki enn hver skaut en við höfum upplýsingar um að einhverjir stuðningsmenn Palmeiras hafi verið vopnaðir. Rannsókn málsins stendur yfir,“ sagði lögreglufulltrúi í Sao Paulo við Reuters-fréttastofuna.

Ricardo Gomes, stjóri Vasco da Gama, var lagður inn á sjúkrahús en hann fékk hjartaáfall í síðari hálfleik á leik liðs síns gegn Flamengo. Gomes, sem er aðeins 46 ára gamall og fyrrum landsliðsmaður Brasilíu, fékk minniháttar hjartaáfall á síðasta ári þegar hann var stjóri Sao Paulo.

Corinthians er efst í brasilísku deildinni eftir 19 umferðir. Liðið hefur 37 stig, Flamengo 36, Sao Paulo og Vasco da Gama 35 og Botafogo 34.