Ók fram á umferðarslys án þess að stansa

Ökumaður sem keyrði framhjá bíl sem hafði oltið í Borgarnesi á laugardaginn ákvað að keyra framhjá vettvangi án þess að stöðva bílinn og veita aðstoð. Maðurinn hringdi aftur á móti í Neyðarlínuna 112 og tilkynnti slysið.

Samkvæmt upplýsingum frá Einari Magnúsi Magnússyni hjá Umferðarstofu bar maðurinn því við að hann hefði verið með börn í bíl sínum og þess vegna ekki treyst sér til þess að stoppa. Þegar slökkviliðs- og sjúkraflutningamenn vildu upplýsingar um aðstæður og fjölda slasaðra voru þær ekki tiltækar vegna þess að maðurinn var farinn af vettvangi.

Einar Magnús segir það færast í aukana að fólk yfirgefi slysavettvang. Hann segir að málið sé grafalvarlegt enda hvíli lagaskylda á fólki að veita aðstoð í aðstæðum sem þessum.