Vantar 22 heimilislækna í Reykjavík - 4 vikna bið eftir tíma

Tuttugu og tvo heimilislækna vantar á heilsugæslustöðvar í Reykjavík. Stjórnamaður í Félagi íslenskra heimilislækna segir stefna í óefni en í dag getur fólk þurft að bíða í allt að fjórar vikur eftir tíma hjá sínum heimilislækni.

Lengi hefur verið skortur á heimilislæknum á höfuðborgarsvæðinu og fáir nýjir læknar bæst í hóp þeirra sem fyrir eru. Heimilslæknar telja stöðuna hafa versnað mikið eftir hrun. Meðalaldur heimilslækna í borginni hefur farið hækkandi og er nú um fimmtíu og fimm ár.

„Það er útlit fyrir það að fjörtíu prósent læknanna á höfuðborgarsvæðinu, sem að eru í föstum stöðum, nái ellilífeyrisaldri á næstu tíu árum og sextíu og fimm prósent á næstu fimmtán árum. Þannig að það mun þurfa verulega endurnýjun og við erum ekki að sjá að sú endurnýjun sé í gangi. Þannig að staðan er ekki góð í dag og stefnir í að verða enn verri á næstu árum," segir Gunnlaugur Sigurjónsson, heilsugæslulæknir.

Þannig hafi fáir sérhæft sig í heimilislækningum á undanförnum árum og þeir sem fara út í nám velja oftar að dvelja þar í lengri tíma en áður. „Ef maður miðar við fimmtán hundruð manns á lækni hér á höfuðborgarsvæðinu þá vantar í dag 22 lækna miðað við stöðuna í dag. Ef nýliðunin verður ekki þá mun sú tala aukast," segir Gunnlaugur.

Þá þarf fólk oft að bíða lengi eftir því að hitta sinn heimilislækni. „Ef fólk ætlar að fara að hitta þann lækni sem það kýs, eða er þeirra læknir, þá er biðin örugglega frá einni upp í fjórar vikur."

Gunnlaugur situr í stjórn Félags íslenskra heimilislækna og segir hann lækna sem starfa á heilsugæslustöðvum borgarinnar almennt hafa áhyggjur af stöðunni. Þeir ræddu hana til að mynda á fundi hjá Læknafélagi Reykjavíkur í síðustu viku. Reglulega sé auglýst eftir læknum en enginn sæki hins vegar um.

„Maður hefur áhyggjur af því að heilsugæslan stefni í óefni. Við höfum haft áhyggjur af því að ef það verður ekki þeim mun meiri nýliðun núna á allra næstu árum þá þarf að fara velta því fyrir sér hvort að heilsugæslan sé eitthvað sem geti staðið til framtíðar."