Óvenjulegur innbrotsþjófur vekur athygli - brýst inn á hverri nóttu

Sérfræðingur segir Dusty sýna af sér áráttukennda hegðun. Eigandinn segir hann einfaldlega stelsjúkan. Ástæðan fyrir því að Dusty er ekki í fangelsi er sú staðreynd að hann er köttur.

Eigendur Dustys tóku eftir því fyrir fjórum árum síðan að dularfullir hlutir birtust án skýringa á heimilinu. Í fyrstu var það hvítur latex hanski. Síðan fóru handklæði, hanskar, jafnvel bikíní að birtast út um allt á heimilinu.

Í ljós kom að Dusty stundar það á hverri nóttu að brjótast inn hjá nágrönnum sínum í San Francisco í Bandaríkjunum og stela hlutum. Og Dusty er það sem mætti kalla stórtækur innbrotsþjófur.

Þannig hefur ein fjölskylda í nágrenni Dustys lent margsinnis í kettinum, sem hefur stolið sex baðfötum, fjölmörgum stuttbuxum og jafnvel handklæðum.

Þau eru aðeins ein af fjölmörgum fórnarlömbum kattarins.

Í viðtali við San Francisco Chronicles segjast þau ekki beinlínis langþreytt á stelsýki kattarins, „okkur líkar vel við Dusty," segir fjölskyldufaðirinn í viðtali við blaðið. Hann bætir hinsvegar við að þau séu hætt að skilja hluti eftir úti í garði. Það sé einfaldara.

Sérkennileg hegðun kattarins hefur orðið til þess að hann er orðin nokkurskonar stjarna vestan hafs. Þannig hefur hann komið fram í þætti David Lettermans auk þess sem Animal Planet hefur fylgst með ránsferðum Dustys.

Hægt er að horfa á innslag með eigendum Dustys og kettinum í þætti Lettermans hér.