Walcott: Hef engar áhyggjur af markaþurrðinni með landsliðinu

Landsliðsmaðurinn Theo Walcott hefur engar áhyggjur af því að hann hafi ekki náð að skora fyrir enska landsliðið í yfir þrjú ár.

Þessi 22 ára leikmaður hefur ekki skorað fyrir England síðan hann gerði þrennu gegn Króötum árið 2008 í undankeppni heimsmeistaramótsins sem fram fór í Suður-Afríku á síðasta ári.

„Ég er að skora fyrir Arsenal,“ sagði Walcott við enska fjölmiðla.

„Vonandi get ég farið að leika eins vel fyrir landsliðið og ég hef gert fyrir Arsenal síðustu mánuði“.

„Ég er bara 22 ára og fólk á það til að gleyma því. Ég hef reynt að setja ekki pressu á sjálfan mig varðandi markaþurrðina, á meðan liðinu gengur vel þá er ég ánægður“.

Englendingar mæta Walesverjum á þriðjudaginn á Wembley og þar verður Theo Walcott í eldlínunni.