Bretar varaðir við falli evrunnar

Það var Jack Straw fyrrverandi utanríkisráðherra Bretlands sem varaði breska fjármálaráðuneytið við. Hann sagði að úr þessu væri skjótur endir hins sameiginlega myntbandalags skárri kostur en hægfara dauði. Í umræðum á breska þinginu kröfðust þingmenn úr öllum flokkum þess að landið taki ekki þátt í frekari neyðaraðstoð við Grikkland og ýtti þess í stað á það að yfirgefa myntbandalagið og taka drökmuna upp aftur sem sinn gjaldmiðil.



Bæði David Cameron forsætisráðherra og George Osborne fjármálaráðherra hafa tekið undir þetta. Cameron sagði að hann myndi berjast hart fyrir því í Brussel að peningar breskra skattborgara yrðu ekki notaðir til að hjálpa Grikklandi.

Grikkir eiga völina og kvölina



Breska blaðið The Telegraph segir að Mark Hoban aðstoðarráðherra í fjármálaráðuneytinu hafi viðurkennt að ýmsar leiðir séu til skoðunar þar. Hann sagði að ekki væri viðeigandi að ræða það í smáatriðum. Hinsvegar yrði hann sekur um vanrækslu ef engar ráðstafanir yrðu gerðar til þess að bregðast við gjaldþroti Grikklands.



Forseti framkvæmdastjórnar Evrópusambandsins leggur mikla áherslu á að Grikkjum verði hjálpað. Til þess að svo megi verða þurfa þeir hinsvegar að grípa til mikilla skattahækkana og niðurskurðar. Atkvæðagreiðsla um það verður á gríska þinginu í kvöld.