Segja skattinn vera aðför að starfsfólki

Sá 5,45% fjársýsluskattur sem efnahags- og viðskiptanefnd Alþingis hefur lagt til að lagður verði á allar launagreiðslur fjármálafyrirtækja, er hrein og bein aðför að starfsfólki tryggingafélaga á Íslandi, segir í yfirlýsingu frá formanni VR og forstjórum tryggingafélaganna.

Í yfirlýsingunni segir að rekstrarkostnaður tryggingafélaga byggi að mjög stórum hluta á launakostnaði og þegar álögur í þeim efnum hækki jafn mikið og nú sé lagt á ráðin um, geti það haft alvarlegar afleiðingar í för með sér fyrir starfsfólk fyrirtækjanna. Það sé eindæmi að stjórnvöld á Íslandi leggi auknar álögur á eina starfsstétt umfram aðra með þessum hætti og setji starfsöryggi hennar um leið í algjört uppnám.

Í yfirlýsingunni er Alþingi Íslendinga hvatt til þess að endurskoða þær fyrirætlanir sem felast í þessum skatti og tryggja að við tekjuöflun ríkissjóðs sé jafnræðis gætt milli borgaranna og ekki vegið með harkalegum hætti að tilteknum hópum fólks í landinu. Allar aðgerðir hins opinbera í dag hljóti að miða að fjölgun starfa en ekki fækkun líkt og þessar álögur muni að öllum líkindum hafa í för með sér.