Vilja auka útgjöld til heilbrigðismála

Meirihluti fjárlaganefndar Alþingis leggur til að útgjöld til heilbrigðismála verði aukin um tæpan millljarð samkvæmt breytingartillögu við fjárlagafrumvarpið. Þriðja og síðasta umræða um málið hefst á Alþingi í dag.

Deilt var um þrjú mál innan fjárlaganefndar fyrir þriðju og síðustu umræðu. Í fyrsta lagi útgjöld til heilbrigðismála, fangelsi á Hólmsheiði og aukin framlög til Fjármálaeftirlitsins.

Í breytingartillögum fjárlaganefndar er gert ráð fyrir því að útgjöld til heilbrigðismála verði aukin um níu hundruð og fjörutíu milljónir króna og að hundrað og fimmtíu milljónir verið settar í útboð á hönnun nýs fangelsis á Hólmsheiði í samræmi við tillögu innanríkisráðherra. Þá verða framlög til fjármálaeftirlitsins aukin um rúman hálfan milljarð.

Stjórnarandstaðan kallaði eftir því Alþingi í morgun að þriðju og síðustu umræðu verði frestað meðal annars til að þess efnahags- og viðskiptanefnd geti skilað umsögn um tekjuhlið fjárlaga. Samkvæmt dagskrá Alþingis á þriðju umræðu að ljúka í dag og til stendur að greiða atkvæða um frumvarpið á morgun.