Skipulagsstofnun sökuð um aðför að Vestfjörðum

„Bæjarstjórn Vesturbyggðar mótmælir harðlega aðförinni að samfélaginu á sunnanverðum Vestfjörðum með umsögn Skipulagsstofnunar um vegagerð á Vestfjarðavegi 60 frá Eiði í Vattarfirði að Þverá í Kjálkafirði."

Svo segir í ályktun sem samþykkt var samhljóða á fundi bæjarstjórnar á Patreksfirði í gærkvöldi í tilefni af áliti Skipulagsstofnunar fyrr í vikunni þess efnis að áformaðar endurbætur á 24 kílómetra vegarkafla valdi óbætanlegum skaða.

„Með umsögn sinni leggst Skipulagsstofnun eindregið gegn vegagerð á svæðinu. Skipulagsstofnun er í raun að leggja til gamaldags vegagerð sem er óöruggari og alls ekki í samræmi við þær kröfur sem gerðar eru til nútíma vegaframkvæmda," segir bæjarstjórnin í ályktun sinni.

Og ennfremur:

„Úrskurður Skipulagsstofnunar ber vott um fyrirfram ákveðnar skoðanir á vegagerð á Vestfjörðum og fullkomna vanþekkingu á staðháttum, samfélagi og lífríki á þessu svæði. Reynslan hefur t.d. sýnt fram á að arnarvarp spillist ekki vegna umferðar bíla heldur vegna annarra ástæðna.

Augljóst er á áliti Skipulagsstofnunar að enn á að tefja möguleikana á vegabótum um Vestfjarðaveg nr. 60.

Bæjarstjórn Vesturbyggðar harmar ennfremur að Dýrafjarðargöng séu ekki sett á dagskrá fyrr en árið 2018-20. Það er sorglegt að sjá að samgöngubætur á Vestfjörðum séu svo aftarlega í forgangsröðuninni og raun ber vitni og öðrum verkefnum sem síðar voru áætluð sé skotið fram fyrir án fullnægjandi rökstuðnings og fjármögnunar.

Bæjarstjórn Vesturbyggðar hvetur Vegagerðina til dáða í verkefnum sínum, þau eru mikilvæg fyrir land og þjóð."