Dómari gagnrýnir ákæruvaldið harðlega í Baugsmálinu

Óeðlilegur og óafsakanlegur dráttur sem varð á málsmeðferð í skattahluta Baugsmálsins hafði áhrif á þann dóm sem féll í dag yfir Jóni Ásgeiri Jóhannessyni, Kristínu Jóhannesdóttur og Tryggva Jónssyni. Málið má rekja allt aftur til ársins 2002, eða níu ár aftur í tímann. Ríkissjóður þarf að greiða helminginn af málsvarnarlaunum verjenda hinna dæmdu.

Þetta kemur fram í niðurstöðu fjölskipaðs dóms Héraðsdóms Reykjavíkur þar sem ákæruvaldið er gagnrýnt harðlega fyrir drátt málsins. Fyrir vikið er ákvörðun um refsingu frestað og fellur hún niður að einu ári liðnu. Niðurstaðan hefur engin áhrif á stjórnarsetu þremenninganna.

Saga Baugsmálsins er orðin löng og sviptingasöm eins og segir í dómsorði. Þannig var húsleit ríkislögreglustjóra framkvæmd árið 2002 hjá Baugi.

Sú húsleit varð til þess að þremenningarnir voru ákærðir fyrir auðgunarbrot, tollalagabrot og brot gegn hlutafélögum sumarið 2005.

Ákæran taldi alls fjörutíu liði en 32 var vísað frá í Hæstarétti sama ár. Jón Ásgeir hlaut þriggja mánaða skilorðsbundna refsingu fyrir brot sín. Tryggvi hlaut tólf mánaða skilorðsbundið fangelsi.

Þetta mál, sem nú um ræðir, var höfðað árið 2008. Í úrskurðinum kemur fram að dómararnir telji að dráttur málsins brjóti í bága við stjórnarskrá Íslands og mannréttindasáttmála Evrópu.

Þá segir ennfremur í niðurstöðunni að skjöl, sem ákæruvaldið lagði fyrir dóm, hafi verið í þúsundatali. Ákæruvaldið studdist aðeins við örlítið brot af þeim og hafði ekki fyrir því að fjarlægja óþörf skjöl úr bunkanum, sem olli miklum töfum og umtalsverðri fyrirhöfn.

Því töldu dómararnir eðlilegast að ríkissjóður greiði helminginn af málsvarnarlaunum hinna dæmdu. Skattgreiðendur þurfa því að greiða níu milljónir króna til þess að standa straum af lögfræðikostnaði Jóns Ásgeirs, Tryggva og Kristínar.

Það var Helgi Magnús Gunnarsson, vararíkissaksóknari, sem sótti málið.