Viskíflaskan komin í 175 þúsund - uppboðið klárast í kvöld

Hæsta boð í viskíflöskuna fornu, sem fannst í Nauthólsvíkinni fyrir margt löngu, er komið í 175.000 krónur. Tilboðsfrestur rennur út í kvöld en andvirði flöskunnar mun óskipt renna til Guðmundar Felix Grétarssonar, fyrrverandi starfsmanns Rafmagnsveitunnar, sem eins og kunnugt er safnar nú fyrir kostnaðarsamri handaágræðsluaðgerð í Frakklandi.

Í tilkynningu frá Orkuveitunni kemur fram að það hafi verið starfsmenn fyrirtækisins sem hófu uppboð á flöskunni 16. nóvember síðastliðinn og hefur besta boð hækkað jafnt og þétt síðan. „Lágmarsboð var 20.000 krónur en nú stendur hæsta boð í 175.000 krónum.“

Hægt er að bjóða í flöskuna til klukkan 23:30 í kvöld með tölvupósti á netfangið starfsmannafelag@or.is. Hæsta tilboði verður tekið og flaskan afhent gegn staðgreiðslu.

„Þegar starfsmenn Vatnsveitu Reykjavíkur grófu niður á bilaða lögn í Hlíðarfæti við Nauthólsvík, í maí 1994, kom þessi óátekna viskíflaska í leitirnar.  Hún var á um eins metra dýpi í jarðveginum. Samkvæmt upplýsingum umboðsmanna Ballantines Whiskey á Íslandi, G. Helgason og Melsted h.f., er flaskan að öllum líkindum frá stríðsárunum. Breski herinn hafði einmitt aðsetur á þessu svæði þar sem flaskan fannst. Hér er því um gamalt viskí að ræða. Starfsmenn Vatnsveitunnar náðu oft góðum árangri við leit að lekum og segja má að lekinn hafi verið margvíslegur,“ segir ennfremur.

Starfsmenn OR gáfu Guðmundi 681.908 krónur

Fyrr í mánuðinum gekkst starfsmannafélag Orkuveitunnar fyrir fjársöfnun til styrktar Guðmundi Felix. Starfsfólk gaf 681.908 krónur. OR gaf sömu fjárhæð á móti og fékk Guðmundur því afhenta ávísun að fjárhæð 1.363.816 um miðjan mánuðinn.