Nóg að gera hjá lögreglunni á Selfossi um helgina

Nóg var að gera hjá lögreglunni á Selfossi um helgina þar sem meðal annars slökkvitæki var stolið og tvö hundruð lítrar af gambra voru haldlagðir í Árnessýslu.

Maður var sleginn í andlitið fyrir utan Kaffi Rós í Hveragerði aðfaranótt sunnudags.  Hann átti sér einskis ills von er maður gekk að honum og sló hann tvö hnefahögg.  Árásarþolinn hlaut minni háttar áverka. Það liggur fyrir hver árásarmaðurinn er og málið í rannsókn.

Í gærkvöldi var brotist inn í félagsmiðstöðina Pakkhúsið við Austurveg á Selfossi og þaðan stolið leikjatölvu.

Léttvatnsslökkvitæki var stolið úr stigagangi fjölbýlishúss við Álftarima á Selfossi og losað úr því í anddyri hússins. Óboðnir gestir reyndu á að komast í teiti sem haldið var í einni íbúð hússins. Þeim var vísað frá og líklegt að einhver þessar óvelkomnu hafi gripið tækið með sér. Slökkvitækið fannst í nágrenni hússins.

Aðfaranótt laugardags var afturrúða brotin í hvítri Volkswagen Polo sem stóð í porti til hliðar við skemmtistaðinn 800 Bar á Selfossi. Lögreglan biður þá sem hafa upplýsingar um þessi mál að hafa samband í síma 4801010.

Tvöhundruð lítrar af gambra voru gerðir upptækir á sveitabæ í Árnessýslu í síðustu viku.  Engin suðutæki fundust né tilbúið áfengi. Maður gekkst við því að eiga mjöðin. Gambrinn var gerður upptækur og sýni sent á rannsóknarstofu til styrkleikamælingar. Málið er í rannsókn.

Tilkynnt var um 19 umferðaróhöpp í vikunni.  Flest þeirra eru rakin til hálku og annara óhagstæðra verðurskilyrða. Maður öklabrotnaði eftir samstuð við annan mann þar sem þeir voru við knattspyrnuiðkun á gervigrasvellinum í Þorlákshöfn.

Franskur ferðamaður slasaðist á fæti þar sem hann féll af snjóbretti inni í Reykjadal. Kalla þurfti eftir aðstoð björgunarsveita til að koma manninum í byggð.  Ekki er vitað á þessari stundu hver meiðsli mannsins eru.

Fjórir ökumenn voru kærðir fyrir ölvunarakstur um helgina og einn fyrir akstur undir áhrifum fíkniefna. Svo margir hafa ekki um langan tíma verið kærðir fyrir ölvunarakstur á einni helgi.