Stal meðal annars nautalund - dæmdur í 5 mánaða fangelsi

Karlmaður um þrítugt var í morgun dæmdur í fimm mánaða fangelsi fyrir þjófnaði, skjalafals og fíkniefnalagabrot.

Maðurinn stal meðla annars konfektkassa, dvd-myndum og nautalund úr verslunum á höfuðborgarsvæðinu á síðasta ári. Þá framvísaði hann þrisvar sinnum fölsuðum úttektarbeiðnum í verslunum, sem höfðu verið fylltar út af óþekktum aðila og stimplaðar með stolnum stimpli.

Þá var maðurinn einnig dæmdur fyrir að hafa amfetamín og kannabis í fórum sínum.

Hann játaði brot sín fyrir dómi en með brotunum rauf hann skilorð vegna dóms sem hann hlaut árið 2008 og þótti dómara hæfileg refsing fimm mánaða fangelsi.