Snjóflóð loka Ólafsfjarðarmúla, Víkurskarð lokað

Víkurskarðið er lokað, þar er flutningabíll fastur. Eins loka snjóflóð Ólafsfjarðarmúla. Ófært er milli Akureyrar og Dalvíkur og eins milli Akureyrar og Grenivíkur og beðið er með mokstur.

Þetta kemur fram í tilkynningu frá Vegagerðinni. Þar segir að það séu hálkublettir á Hellisheiði og í Þrengslum. Hálka, hálkublettir eða snjóþekja er á Suðurlandi og Reykjanesi.

Á Vesturlandi er snjóþekja og skafrenningur á Bröttubrekku og snjóþekja og stórhríð á Holtavörðuheiði. Annars er víða hálka eða snjóþekja og skafrenningur.

Á Vestfjörðum er ófært og beðið er með mokstur á Steingrímsfjarðarheiði og á Kettshálsi og þungfært og skafrenningur í Ísafjarðardjúpi og á Kleifarheiði. Snjóþekja og stórhríð er á Gemlufallsheiði.

Á Norðvesturlandi er stórhríð og hálka við Gauksmýri, ófært og mokstur í gangi á Þverárfjalli. Þæfingsfærð og mokstur í gangi á Vatnsskarði, Þæfingsfærð og stórhríð er á milli Sauðárkróks og Hofsós og stórhríð og ófært á Siglufjarðarvegi.

Á Norðausturlandi austan víkurskarðs er víða stórhríð og hálka.

Á Austurlandi er hálka eða snjóþekja á flestum leiðum, Þæfingsfærð og skafrenningur er á Öxi.

Á Suðausturlandi er víða hálka.