Lögreglan: Ljóst að margir brotamenn hafa vopn undir höndum

Lögreglan segir að á hverju ári er lagt hald á verulagt magn af vopnum og oftar en ekki finnast þau við húsleitir í tengslum við rannsóknir mála. Í tilkynningu frá lögreglu segir að nýlega hafi verið lagt hald á nokkrar byssur og tugi hnífa í húsí í Reykjavík. Málið tengist skotárás í austurborginni föstudaginn 18. nóvember síðastliðinn.

„Aukinn vopnaburður brotamanna kemur lögreglunni reyndar ekki á óvart og hún hefur varað við þessari þróun. Ekki síst með tilliti til tengingu brotamanna hérlendis við erlenda glæpahópa, t.d. Hells Angels og Outlaws," segir í tilkynningu frá lögreglu.

Vopnin sem lagt hefur verið hald á síðustu misseri eru af ýmsum toga og má þar helst nefnda haglabyssur, loftbyssur, riffla, skammbyssur, hnífa, hnúajárn, kylfur og raflostbyssur. Lögreglan segir að erfitt sé að henda reiður á fjölda vopna í umferð.

Eftirspurnin sé til staðar og ljóst að margir brotamenn hafa vopn undir höndum eins og dæmin sanna. „Í þessu samhengi verður líka að minnast þess að talsverðum fjölda vopna er stolið á hverju ári. Gera má ráð fyrir að þau lendi í höndum óprúttinna aðila."