Sonur Gaddafis handsamaður

Saif Gaddafi, sonur einræðisherrans Muammars Gaddafis, hefur verið handtekinn samkvæmt líbíska þjóðarráðinu og BBC greinir frá.

Saif var handtekinn í suðurhluta Líbíu en hann er eftirlýstur af Alþjóða stríðsglæpadómstólnum.

Saif er talinn heill á húfi en hann, ásamt lífvörðum hans, sem einnig voru handteknir, hafa verið fluttir til borgarinnar Zintan í norðurhluta landsins.

Faðir hans var drepinn þegar hann var handsamaður í haust en fyrstu fregnir herma að Saif sé heill heilsu.

Mikill fögnuður braust út í Líbíu þegar það fréttist að Saif hefði verið handsamaður, en hann hefur verið á flótta síðan í ágúst, eftir að uppreisnarmenn hernumdu Trípolí, höfuðborg Líbíu.