Lesendum Fox News þykja nærfatauglýsingarnar óhugnanlegar

„Eins mikið og ég vildi bregðast við rógburðinum sem ég og dóttir mín höfum þurft að þola þessa vikuna, hef ég kosið að hefja mig upp fyrir slíkt þras," segir Jóhanna Metúsalemsdóttir skartgripahönnuður, sem hefur verið gagnrýnd harðlega fyrir að sitja fyrir á nærfötunum ásamt tæplega tvítugri dóttur sinn, í viðtali við vefsíðuna Lingerietalk.com.

Mæðgurnar auglýstu nærfatnað fyrirtækisins The Lake and stars, en auglýsingarnar voru afar umdeildar í Bandaríkjunum. Meðal annars voru mæðgurnar harðlega gagnrýndar á vefsíðunni Hufington Post auk þess sem Fox News sjónvarpsstöðin fjallaði um málið í The Today Show.

Á vefsíðu Fox News var hægt að kjósa um það hvort lesendum þættu auglýsingarnar sætar eða óhugananlegar (e. creepy). 84 prósent þeirra sem tóku þátt í netkönnuninni þóttu auglýsingarnar óhugnanlegar.

Það var ekki bara í Bandaríkjunum þar sem fólk hneykslaðist á mæðgunum. Þannig gagnrýndi María Lilja Þrastardóttir auglýsingarnar og velti því fyrir sér í pistli á Smugunni að með auglýsingunum væri verið að klámvæða móðurástina.

Jóhanna segir í fyrrnefndu viðtali að henni þyki auglýsingarnar fallegar og hafi enga þörf fyrir að verja þær sérstaklega.