Neville hefur ekki trú á enska landsliðinu

Gary Neville, fyrrum leikmaður Manchester Untied, telur ólíklegt að England eigi möguleika á að vinna Evrópumeistaratitilinn í Póllandi og Úkraínu næsta sumar.

Englendingar tryggðu sér sæti í úrslitakeppninni með því að gera 2-2 jafntefli við Svartfjallaland á föstudagskvöldið. Mikið hefur verið fjallað um rauða spjaldið sem Wayne Rooney fékk í leiknum en Neville segir að umræðan sé á villigötum.

„Það sem við ættum að vera að tala um er að leikmenn sem mynda hryggjarstykkið í liðinu geta hvorki hreyft sig eða haldið boltanum,“ skrifaði hann í dálki sínum í enska dagblaðinu Mail on Sunday. „Aðalmálið er að mikilvægustu leikmenn liðsins eru bara ekki nógu góðir.“

„Það er mitt kalda mat að lið sem er með þá John Terry og Gary Cahill í vörn, Scott Parker og Gareth Barry á miðjunni og þá Darren Bent og Wayne Rooney frammi sé ekki nógu gott til að geta skákað bestu liðunum, eins og spænska landsliðinu.“

„Þetta eru margir hverjir góðir leikmenn sem við eigum en ef við setjum Rooney til hliðar búa þessir leikmenn ekki yfir miklum hraða, geta ekki skapað mikið eða nógu fjölhæfir til að spila fleiri stöður.“

England mætir Spánverjum í vináttulandsleik í næsta mánuði og segir Neville að ef spænska landsliðið muni gjörsigra þann leik hafi það slæm áhrif á hugarfar liðsins fyrir úrslitakeppni EM næsta sumar.

„Leikmenn enska landsliðsins verða að trúa því að þeir geti unnið lið eins og Spánverja þegar allt gengur upp. Við eigum marga unga leikmenn sem eru fljótir, hæfileikaríkir og bera ekki þá byrði að hafa mistekist í fortíðinni. Þetta eru leikmenn eins og Chris Smalling, Kyle Walker, Phil Jones, Tom Cleverly, Alex Oxlade-Chamberlain og Danny Welbeck.“

„Capello (landsliðsþjálfari) verður að nota þessa leikmenn í blandi við eldri og reyndar leikmenn og reyna að þannig að búa til lið sem á möguleika á að vinna Spánverja. Það er nefnilega alveg ljóst að liðið sem spilaði á föstudaginn (gegn Svartfjallalandi) á engan möguleika gegn Spánverjum. Capello þarf nú að vera hugrakkur.“