Eiður Smári kom inn á sem varamaður og skoraði eftir mínútu

Eiður Smári Guðjohnsen byrjaði á varamannabekknum hjá AEK Aþenu í dag þegar liðið sótti Skoda Xanthi heim í grísku úrvalsdeildinni í fótbolta. Íslenski landsliðsmaðurinn var hinsvegar fljótur að láta til sín taka þegar hann kom inn á 75. mínútu og var búinn að skora sitt fyrsta mark fyrir félagið mínútu síðar. Eiður Smári lagði einnig upp síðasta mark AEK í leiknum.  

AEK Aþena vann leikinn 4-3 eftir að hafa lent 0-1 undir eftir aðeins þrettán mínútur. Kólumbíumaðurinn Fabián Vargas og fyrirliðinn Nikos Liberopoulos voru búnir að koma AEK í 2-1 fyrir hálfeik.

Eiður Smári kom inn á 75. mínútu fyrir Nikos Liberopoulos fyrirliða sem varð að yfirgefa völlinn vegna meiðsla. Það tók Eið aðeins eina mínútu að skora en hann skoraði markið af stuttu færi eftir góðan undirbúning frá Kamerúnmanninum Steve Leo Beleck.

Skoda Xanthi náðu að minnka muninn í 3-2 á 84. mínútu en Eiður Smári lagði upp mark fyrir Victor Klonaridis sem kom AEK í 4-2. Eiður hafði áður fengið gult spjald fyrir að tefja. Xanthi skoraði síðan þriðja markið sitt rétt fyrir leikslok og það var því mark Eiðs Smára sem á endanum skildi á milli liðanna.

Eiður Smári hafði ekki náð að skora í fjórum fyrstu opinberu leikjum sínum með AEK-liðinu en þar á meðal var 1-0 sigur liðsins á Diethnis Enosis Ergotelis í fyrsta leik liðsins í grísku deildinni. AEK hefur því unnið tvo fyrstu leiki sína í grísku úrvalsdeildinni.