„Við ætlum bara að klára okkar og gera það sem við mögu­lega getum“

„Virkilega góður leikur hjá okkar drengjum“ sagði Lúðvík Gunnarsson annar þjálfara u21 landsliðs Íslands eftir sigurinn í dag.

„Við gerðum svona nokkurn veginn það sem við lögðum upp með. Við spiluðum góðan varnarleik og eins og við töluðum um fyrir leik þá erum við með hættulega menn þarna fram á við sem geta gert ótrúlegustu hluti“

Íslenska liðið var virkilega beitt fram á við og var unun að horfa á strákana fremst leika listir sínar.

„Þeir eru helvíti seigir þessir drengir og koma með mjög margt skemmtilegt að borðinu. Þeir eru ólíkir en eru með ofboðslega mikil gæði og þegar þeir sýna þessi gæði eins og þeir gerðu í dag þá er ógeðslega gaman að horfa á þá“

Íslenska liðið datt örlítið niður í leiknum en létu það þó ekki slá sig út.

„Það kom þarna kafli í leiknum þar sem við duttum aðeins niður en við erum bara góðir í þeim köflum eins og staðan er akkúrat í dag. Við erum ekki að fara of langt niður og við náum að halda góðu jafnvægi áfram og svo létum við kné fylgja kviði eftir að mörkin fóru að koma inn“

„Þetta var bara ógeðslega góð frammistaða hjá strákunum og þeir eiga mikið hrós skilið“

Íslenska liðið er búið að koma sér í góða stöðu fyrir lokaleik sinn í riðlinum gegn Færeyjum. Íslenska liðið þarf sigur og vona að Sviss geri ekki mikið á móti Frökkum til að tryggja sig í umspil fyir EM.

„Þegar við tókum við þessu á sínum tíma þá var þetta bara mjög einfalt í rauninni. Við ætluðum ekkert að vera litlir, við ætluðum að að keyra á þetta og fara fulla ferð“

„Þetta er búið að vera þannig núna í síðustu leikjum að það hefur verið góður stígandi í spilamennskunni. Úrslitin á móti Frakklandi í síðsta leik voru mjög góð, úrslitin í dag eru virkilega góð og við verðum að vinna leikinn á móti Færeyjum og vona að Sviss fái ekki mikið út úr leiknum gegn Frökkum þannig þetta er ekki alveg í okkar höndum annað en það að við ætlum bara að klára okkar og gera það sem við mögulega getum“ sagði Lúðvík Gunnarsson.