Peningarnir tala í knattspyrnunni

Ríkasta knattspyrnufélagið í heiminum, Manchester City, eyddi mest allra félaga á meðan félagsskiptaglugginn var opinn í sumar.

Franska félagið, Paris St. Germain, kom þar á eftir en félagið fór mikinn á leikmannamarkaðnum, en velauðugur maður frá Katar er aðal eigandi klúbbsins.

Paris St. Germain tók heldur betur upp veskið í sumar og eyddi um 75 milljónum punda eða 13,9 milljörðum íslenskra króna í leikmannakaup.

Manchester City gerði aðeins betur og eyddi 76 milljónum punda sem gerir 14,1 milljörðum íslenskra króna.

Hinn 41 árs eigandi Manchester City, Sheikh Mansour, festi kaup á þeim Sergio Aguero, Gael Clichy, Stefan Savic og Samir Nasri í sumar. Sheikh Mansour hefur eytt 460 milljónum punda í þá 28 leikmenn sem félagið hefur fest kaup á síðan hann fjárfesti í félaginu fyrir þremur árum. Ef sú upphæð er umreiknuð yfir í íslenskar krónur þá gerir það 86 milljarðar króna.

Paris St. Germain festi kaup á hinum argentínska, Javier Pastore, sem kom til félagsins frá Palermo á Ítalíu fyrir 37 milljónir punda. Félagið eyddi einnig umtalsverðri fjárhæp í Kevin Gameiro frá Lorient, Blaise Matuidi frá St Etienne, Jeremy Menez frá Roma, Mohamed Sissoko frá Juventus sem og Diego Lugano.

Paris St. Germain ætlar sér ekkert annað en franska meistaratitilinn í ár eins og leikmannakaupin gefa til kynna.

Samuel Eto´o stendur líklega best af vígi fjárhagslega eftir félagskiptin í sumar, en hann fór frá Inter Milan til Anzhi Makhachkala frá Rússlandi fyrir 27 milljónir punda. Leikmaðurinn fær 60 milljónir íslenskra króna í laun á viku sem gerir 3,3 milljarða í árslaun, nokkuð gott hjá Eto´o.

Félögin í ensku úrvalsdeildinni eyddu samtals 430 milljónum punda í leikmannakaup á meðan glugginn var opinn en það gerir um 80 milljarða íslenskra króna, en það er umtalsvert stærri upphæð en fyrir ári síðan.