Vesen í gríska boltanum

Fresta þurfti þremur af átta leikjum fyrstu umferðar gríska boltans um helgina. Ástæðan er sú að þrjú af liðunum sextán í grísku deildinni hafa ekki enn fengið grænt ljós á þátttöku sína.

Hagræðing úrslita er stórt vandamál í gríska boltanum og hafa rúmlega 80 manns verið ákærðir til lögreglu af þeim völdum. Meðal annarra eru Makis Psomiadis, eigandi Kavala og Achilleas Beos, forseti Olympiakos Volos, sem voru dæmdir í lífstíðarbann frá afskiptum að knattspyrnu.

Félögin tvö, Kavala og Volos, eru meðal þeirra sem hefðu átt að spila um helgina en EEA, íþróttamálanefnd í Grikklandi, úrskurðaði í síðustu viku að félögin yrðu felld niður í 4. deild þar sem þau hafa ekki skorið á tengsl sín við umrædda eigendur. Nefndin á þó eftir að gefa grænt ljós á þátttöku Doxa Dramas og Levadiakos, félaganna sem taka eiga sæti þeirra í efstu deild.

Volos og Kavala hafa hins vegar ekki gefið upp alla von og fengu á föstudag lögbann á þátttöku Dramas og Levadiakos í sinn stað. EEA-nefndin hefur því ekki tök á að ganga frá þátttöku nýju félaganna í bili.

Til að flækja málin enn frekar fyrir skipuleggjendur grísku deildarinnar hefur Iraklis, sem var fært niður um deild fyrir skjalafölsun þrátt fyrir að bjarga sér frá falli á lokadegi síðasta tímabils, unnið áfrýjun hjá gríska knattspyrnusambandinu. Félagið spilar því áfram í efstu deild eftir allt saman og Asteras Tripolis, sem halda átti sæti sínu í deildinni í stað Iraklis, fer niður í næstefstu deild.

Meistarar Olympiakos áttu að spila gegn Kavala um helgina en gátu ekki hafið titilvörn sína af ofangreindum ástæðum. Sömu sögu er að segja um AEK, lið Eiðs Smára Guðjohnsen og Elfars Freys Helgasonar, sem átti að leika gegn Volos. Panathinaikos hóf hins vegar tímabilið með 2-0 útisigri á Kerkyra.