Ítalía-Spánn í beinni í staðinn fyrir England-Holland

Stöð 2 Sport 3 mun sýna leik Ítalíu og heimsmeistara Spánar í beinni á morgun í staðinn fyrir leik Englands og Hollands sem var aflýst fyrr í dag vegna óeirðanna í Lundúnaborg. Leikurinn fer fram í Bari og hefst klukkan 18.45 að íslenskum tíma. Leikurinn er á Stöð 2 Sport 3 þar sem leikur Íslands og Ungverjalands er sýndur á Stöð 2 Sport á sama tíma.

Leikur Ítala og Spánverja er viðureign tveggja síðustu heimsmeistara, Ítalir unnu HM 2006 en Spánverjar urðu heimsmeistarar í fyrsta sinn í Suður-Afríku fyrir rúmu ári síðan.

Þetta er fyrsti leikur þjóðanna síðan að Spánverjar unnu í vítakeppni í átta liða úrslitum Evrópumótsins 2008. Sá leikur markaði viss þáttaskil fyrir Spánverja sem fóru síðan alla leið og tryggðu sér Evrópumeistaratitilinn. Þeir hafa síðan ekki litið til baka eftir það.