Bruninn í Eden: Mildi að ekki hreyfði vind

Eden í Hveragerði brann til kaldra kola í nótt. Eldhafið var gríðarlegt og áttu slökkviliðsmenn ekki annan kost en að láta húsið brenna til ösku. Ekki leikur grunur á íkveikju en mildi þótti að ekki hreyfði vind því annars hefði eitraður reykur getað lagst yfir Hveragerði.

Eldsins varð vart laust eftir miðnætti í gærnótt. Húsið varð alelda á innan við hálftíma. Eldtungurnar teygðu sig langt til himins og gríðarlegur hávaði barst frá eldinum. Slökkviliðsmenn reyndu að fara inn í húsið en urðu að hörfa undan æðandi eldtungum. Vegfarendur fylgdust með og voru margir í uppnámi þegar eldurinn hreinlega gleypti Eden.

Hvergerðingar voru heppnir að ekki hreyfði vind, annars hefði getað farið verr. „Já, það var mikil mildi að það var blankalogn. Orkan í eldinum var slík að eldurinn skapaði sitt eigið veðurkerfi, háloftavindarnir báru reykinn burt og ég hefði ekki viljað sjá þennan reyk leggjast yfir bæinn með þeim eiturefnum sem í honum er," segir Pétur Pétursson, varaslökkviliðsstjóri Brunavarna Árnessýslu. Ekki leikur grunur á íkveikju. „Rannsókn stendur yfir en ekki grunur um íkveikju," segir Pétur.

Um hálf fimm leytið í morgun var eldurinn kulnaður, slökkviliðsmenn stóðu vaktina og um hádegisbilið í dag var rannsókn á brunanum hafin.Það er ljóst að krafturinn í eldinum í gær var mikill og húsið rústir einar, sumir bæjarbúar segja það hins vegar táknrænt að eina sem eftir standi sé hurðin. Sjálfur inngangurinn að Eden.

„Þetta er gríðarlegt áfall," segir Aldís Hafsteinsdóttir, bæjarastjóri. Eden eigi sér langa sögu. Aldís varð sjálf vitni að brunanum þar sem hún var á kvöldgöngu og tilkynnti hann til neyðarlínunnar. „Þetta var með ólíkindum að sjá hversu hratt hann breiddist út. Húsið fuðraði upp."

Bruninn í Eden hefur vakið sterk viðbrögð víða í samfélaginu. Nær allir Íslendingar eiga sínar minningar úr Eden. Fjölmargir lögðu leið sína að rústum Eden í dag til að berja rústirnar augum.