Messi: Ekki bera saman Argentínu og Barcelona

Leonel Messi segir ekki hægt að bera saman Barcelona og landslið Argentínu. Spænska liðið hafi unnið saman sem heild í mun lengri tíma. Fjölmiðlar í Argentínu fór ófögrum orðum um landslið sitt að loknum tveimur jafnteflum í Suður-Ameríkukeppninni í knattspyrnu. Messi sýndi allar sínar bestu hliðar í 3-0 sigri á Kostaríka í lokaleik riðilsins.

Fjölmiðlar í Argentínu hafa farið nokkuð mjúkum höndum um töframanninn örvfætta. Þó hafa sumir sparkspekingar í gegnum tíðina haldið því fram að Messi myndi hætta að spila með Argentínu og alfarið einbeit sér að félagsliði sínu.

„Ég hef aldrei látið umræðu í fjölmiðlum hafa áhrif á mig. Ég held að engum líki það þegar baulað er á þá eða þeir móðgaðir á annan hátt. Við viljum meir en allir gera góða hluti,“ sagði Messi við argentínska fjölmiðla.

„Það eru mistök að bera landsliðið saman við Barcelona. Við höfum unnið saman í langan tíma hjá Barcelona. Í landsliðinu erum við að reyna að gera svipaða hluti. Halda boltanum og stjórna hraða leiksins en það er ekki hægt að bera saman liðin tvö saman. Hvorki hópinn né einstaklingana,“ sagði Messi.

Argentína hefur ekki unnið stórmót síðan í Suður-Ameríkukeppninni árið 1993.

„Argentína þarf á titli að halda. Það er orðið langt síðan við unnum titil,“ sagði Messi.