Molde í efsta sæti undir stjórn Ole Gunnar Solskjær

Ole Gunnar Solskjær fyrrum leikmaður Manchester United hefur byrjað gríðarlega vel sem þjálfari norska úrvalsdeildarliðsins Molde. Solskjær tók við liðinu í vetur eftir að hafa náð frábærum árangri  sem þjálfari varaliðs Manchester United. Molde er sem stendur í efsta sæti deildarinnar að loknum 15 umferðum en á síðustu fjórum árum hefur það lið orðið norskur meistari sem var í efsta sæti á þessum tímapunkti í deildinni. 

Liðið hefur ekki fengið fleiri stig frá árinu 1999 en þá endaði liðið í öðru sæti á eftir Rosenborg. Molde á 100 ára afmæli á þessu ári og stuðningsmenn liðsins eru vongóðir um að Solskjær færi félaginu meistaratitil í afmælisgjöf en hann lék með liðinu áður en hann var keyptur til Manchester United.