Ókeypis bjór á hamfarasvæðinu í Japan

Eitt stærsta brugghúsið í Japan hefur nú í hyggju að senda svokallaðan bjórvagn á hamfarasvæðin á austurströnd landsins og gefa þar fórnalömbum og hjálparstarfsmönnum ískaldan bjór, án endurgjalds.

Bjórvagninn, sem er á vegum Asahi brugghúsanna, mun á ferð sinni milli hátíða og viðburða á austurströndinni deila út bjór til þeirra sem þar eru nú að takast á við eftirmála fljóðbylgjunnar sem skall á landinu þann 11. mars síðastliðinn.

Forstjóri fyrirtækisins segir hugmyndina ekki aðeins hannaða til að létta lund þeirra sem lifðu hamfarirnar af, heldur komi bjórgjafirnar einnig til með að hjálpa þeim sem svitni við enduruppbyggingarvinnu á svæðinu.