Óánægja á meðal Eve Online spilara

Mikil óánægja er meðal þeirra sem spila fjölspilunarleikinn EVE Online, verðmætustu afurð íslenska tölvuleikjafyrirtækisins CCP, en þessi óánægja birtist á spjallborði leiksins á veraldarvefnum, að því er fram kemur í DV.

Í nýrri viðbót við leikinn geta leikmenn notað raunverulega fjármuni til að kaupa sér hluti í leiknum. Að svo stöddu er hægt að kaupa hluti á borð við einglyrni og boli á karaktera, allt hluti sem hafa engin raunveruleg áhrif á framgang leiksins.

Það er tvennt sem hefur vakið upp illindi á meðal spilara í leiknum en það er annars vegar verðið á þessum hlutum og hins vegar hvert fyrirtækið stefnir með þennan sölumarkað. Fyrir stuttu lak nefnilega út innra fréttabréf fyrirtækisins á netið þar sem fyrirtækið virðist stefna að því að setja hluti á borð við betri geimskip og hæfileika innan leiksins til sölu.

Allt hluti sem leikmenn hafa jafnvel tekið langan tíma í að byggja upp en væri þá hægt að kaupa fyrir raunverulegt fé ef af verður. Á fjórða hundrað þúsund leikmanna frá öllum heimshornum spila EVE Online á netinu.