Jón Guðni: Fáir hjá okkur sem voru í takt við leikinn

Íslenska 21 árs landsliðið fékk á sig mark eftir aðeins fimmtíu sekúndur á móti Sviss í dag og varð síðan að sætta sig við 0-2 tap. Miðvörðurinn Jón Guðni Fjóluson var daufur eftir leik.

„Við náðum aldrei að komast í takt við leikinn í fyrri hálfleik. Við fengum mark á okkur eftir eina mínútu og áttum erfitt uppdráttar eftir það," sagði Jón Guðni Fjóluson.

„Ég held að Svissararnir séu töluvert sterkari en Hvít-Rússar og þeir sýndu það í dag. Við vorum ekki á tánum og fengum það bara í bakið. Við áttum lítið meira skilið úr þessum leik," sagði Jón Guðni.

„Það voru fáir hjá okkur sem voru í takt við leikinn og það var ekki bara miðjan. Mér fannst Björn Bergmann koma vel inn í þetta en annars vorum við bara lélegir í dag," sagði Jón Guðni.

„Það sem er sárast er þessi byrjun og menn hafi ekki verið betur tilbúnir í leik sem við þurfum í það minnsta að fá eitt stig út úr. Það er frekar lélegt," sagði Jón Guðni en það má sjá allt viðtalið með því að smella hér fyrir ofan.