Eyjólfur: Danir með leikmenn sem geta klárað leiki

Eyjólfur Sverrisson landsliðsþjálfari segir að danska liðið sé skipað sterkum einstaklingum sem geti klárað leiki upp á sitt einsdæmi.

Ísland mætir Danmörku á EM U-21 liða í dag og þarf að vinna stórt til að eiga möguleika á að komast áfram í undanúrslit. Liðið hefur tapað sínum fyrstu tveimur leikjum á mótinu og leikmenn eru staðráðnir í að sýna sitt rétta andlit í kvöld.

„Danska liðið er gríðarlega sterkt. Það er vel spilandi og er klárt í að halda boltanum. Þeir eru mikið í stutta spilinu,“ sagði Eyjólfur á blaðamannafundi íslenska liðsins hér í Álaborg í gær.

„Þeir eru líka með sterka einstaklinga sem geta klárað leiki fyrir þá - eins og þá Christian Eriksen og Nicolai Jörgensen sem eru báðir gríðarlega öflugir leikmenn,“ sagði Eyjólfur og benti á að þeir hefðu einmitt gert það þegar að Danir unnu 2-1 sigur á Hvít-Rússum á þriðjudagskvöldið. Þá skoruðu Jörgensen og Eriksen mörk danska liðsins.

Ísland stjórnaði miðjuspilinu gegn Hvíta-Rússlandi lengst af en það gekk ekki eins vel í leiknum gegn Sviss. Þá skipti Eyjólfur yfir í 4-4-2 og fór að beina spili liðsins meira í gegnum kantana. Eyjólfur segir að liðið verði að vera fjölbreytt í sínum sóknarleik gegn Dönum í dag.

„Þetta verður að vera beggja blands. Við viljum ekki bara sækja á annan veginn. Við erum með okkar hlaupaleiðir og förum þar sem þeir munu gefa færi á sér,“ sagði Eyjólfur.

Spurður hvort að danska liðið henti því íslenska betur en önnur lið í keppninni sagði hann svo ekki vera. „Þetta eru átta liða úrslit og hingað eru komin mjög sterk lið sem öll eru jöfn að getu. Þetta er því sem fyrr spurning um dagsformið og hvort liðið er klárt í slaginn.“