Birta ekki myndir af Osama Bin Laden látnum

Obama Bandaríkjaforseti hefur ákveðið að birta ekki myndir af líki Osama Bin Laden en Hvíta húsið staðfesti í dag að hann hefði verið óvopnaður þegar hann var drepinn aðfaranótt mánudags. Hópur stuðningsmanna hans safnaðist saman í dag og brenndi meðal annars bandaríska fánann.

Fyrstu fréttir af árásinni gegn Bin Laden sem Bandaríkjaforseti horfði á í beinni útsendingu voru þær að hann hefði veitt mótspyrnu, verið vopnaður og skýlt sér á bak við eiginkonu sína.

Mótsagnakenndar frásagnir hafa hinsvegar vakið upp spurningar en talsmaður Hvíta hússins upplýsti í dag að Bin Laden hefði ekki verið vopnaður.

Stuðningsmenn hans eru margir hverjir mjög ósáttir með endalok leiðtoga síns og söfnuðust saman í dag þar sem Bandaríski fáninn var meðal annars brenndur.

Obama Bandaríkjaforseti upplýsti seinni partinn í dag að myndir af líki Bin Ladens verði ekki birtar í fjölmiðlum. Mikill þrýstingur hefur verið á Bandaríkjamenn að birta myndirnar sem sagður eru afa ógeðfelldar, en margir hafa dregið dauða hans í efa.

Ljóst er að birting myndanna í fjölmiðlum hefði vakið upp hörð viðbrögð meðal múslima, en fastlega er búist við því að stuðningsmenn Bin Ladens muni hefna fyrir dauða leiðtoga síns.