Fjórir piltar ákærðir fyrir árás á meðferðarheimili

Fjórir piltar á aldrinum sextán til átján ára hafa verið ákærðir af ríkissaksóknara fyrir að hafa ráðist á starfsmann á meðferðarheimilinu Háholti í Skagafirði í sumar. Piltarnir læstu starfsmanninn inni, stálu peningum og struku á stolnum bíl.

Á vef Pressunnar er sagt frá ákærunni en piltarnir veittust að starfsmanninum í sjónvarpsholi, eldhúsi og á göngum heimilisins. Einn piltanna á að hafa barið starfsmanninn ítrekað með sundurskrúfuðum billjardkjuða, með fjögurra sentimetra járnteini á öðrum enda.

Samkvæmt ákærunni eiga piltarnir að hafa læst starfsmanninn inni í neyðarherbergi þar sem hann sat fastur í fimm klukkutíma.

Þegar málið kom upp í júlí á þessu ári sagði varðstjóri hjá lögreglunni í Skagafirði að piltarnir hafi verið handteknir á gistiheimilinu á Akureyri daginn eftir að þeir struku.

Meðferðar- og skólaheimilið Háholt er einkarekið á grundvelli þjónustusamnings við Barnaverndarstofu. Tvö slík meðferðarheimili eru hér á landi en hið þriða ríkisrekið.

Í Háholti dvelja 15-18 ára unglingar og eru þeir kallaðir nemendur, samkvæmt heimasíðu Barnaverndarstofu. Þeir eiga það það sameiginlegt að eiga við alvarlegan hegðunarvanda að stríða. Nemendur hafa leiðst út í fíkniefnaneyslu, komist í kast við lögin, eiga í vandræðum í skóla og í félagslegum vanda af ýmsu tagi.

Í einstaka tilvikum dvelja nemendur í Háholti sem dæmdir hafa verið til fangavistar. Samkvæmt samkomulagi Fangelsismálastofnunar og Barnaverndarstofu stendur unglingum til boða að afplána fangelsisdóm í Háholti.