Óvissumerki innan Vinstri grænna gætu haft áhrif á samstarfið

„Ég held að ríkisstjórnin sjái þetta þannig að það sé enginn annar betri valkostur og þess vegna sé hún ákveðin í að lifa þetta af," segir Gunnar Helgi Kristinsson, stjórnmálafræðiprófessor. Hann segir að tímasetning Lilju Mósesdóttur og Atla Gíslasonar um að segja sig úr þingflokknum í dag hafi komið á óvart.

Gunnar Helgi segir að á milli forystufólks í ríkisstjórninni og þorra þingmanna ríki traust og þess vegna sé hún ákveðin í að þrauka. Hann nefnir að Alþingi gæti lagt fram vantraust á ríkisstjórnina en það sé ekki að fara gerast eins og staðan er í dag.

Óvissumerki innan Vinstri grænna

Hann segir að ríkisstjórnin hafi ennþá meirihluta á þingi, 33 þingmenn á móti 30, en það séu hinsvegar óvissumerki innan Vinstri grænna sem gætu haft áhrif á stjórnarsamstarfið, sem hafa verið í hinni svokölluðu Órólegu deild.

„Óvissumerkin eru Jón Bjarnason, Ögmundur Jónasson, Ásmundur Einar Daðason og Guðfríður Lilja, þegar hún kemur aftur úr barneignarleyfi," segir Gunnar Helgi. „Annars vegar hafa þau efasemdir um ýmsa þætti í stjórnarstefnunni og hins vegar um starfshætti ríkisstjórnarinnar - að vera í ríkisstjórn fylgi einhver kvöð," segir hann.

Ólíklegt að þriðji flokkurinn komi í ríkisstjórn

Hann segir að hlutverk þessarar ríkisstjórnar hafi verið að slökkva eldana eftir búsáhaldabyltinguna og það sé enginn flokkur núna á þingi sem getur tekið við því slökkvistarfi. Þá sé ólíklegt að þriðji flokkurinn hafi áhuga á að koma inn í ríkisstjórnarsamstarfið. „Af því að þessir tveir flokkar hafa meirhluta á þingi, því yrði þriðji flokkurinn alltaf óþarfur í ýmsum málum og það er hætta á að það myndi veikja samningsstöðu hans í ríkisstjórn.“

Ef kosið yrði núna, segir Gunnar Helgi, að Samfylkingin og Vinstri grænir kæmu illa út úr þeim kosningum. „Besti flokkurinn hefur til dæmis gefið það út að hann ætli að bjóða fram á landsvísu í næstu þingkosningum, segir hann og bendir einnig á að kjósendur séu ósáttir við stjórnmálastéttina í landinu.

Ekki sjálfgefið að Jón Bjarnason verði til friðs

Um stöðu Jóns Bjarnasonar, sjávarútvegs- og landbúnaðarráðherra, innan ríkisstjórnarinnar segir Gunnar Helgi að það sé ekki sjálfgefið að hann verði til friðs. „Meðan hann er ráðherra þá er hann sennilega tilbúinn í allskonar málamyndanir, því hann hefur áhrif sem ráðherra. En ef það á að fara leggja niður hans ráðherraembætti þá er ekki sjálfgefið að hann verð til friðs. Þetta setur ríkisstjórninni mörk."

Hann bendir á að Lilja og Atli - ásamt Ásmundi Einari Daðasyni, hafa fylgst að við afgreiðslu fjárlagana og einnig á fundi í flokknum í byrjun janúar. „En hinsvegar átti enginn von á þessu núna í dag, þetta kemur á óvart í þeim skilningi. Ég þori ekki að túlka það, en þetta er eflaust í framhaldi af ákveðinni atburðarrás sem við erum í sjálfu sér búin að horfa á í langan tíma," segir Gunnar Helgi að lokum.