Segja leyniskjöl DV úr blárri möppu sem hvarf

Lögmaður fjárfestingafélagsins Horns, segir að trúnaðarskjölin sem DV hefur undir höndum hafi mikla þýðingu fyrir félagið. Í þeim kemur meðal annars fram tilboð í ákveðin félög, nöfn tilboðsgjafa, samningatækni Horns, verðmyndandi upplýsingar um skráð félög hérlendis og erlendis ofl. Upplýsingar sem DV hefur undir höndum hafi verið í blárri möppu sem var tekin saman fyrir stjórnarfund félagsins og sé nú horfin.

Þetta kemur fram í úrskurði Sýslumannsins í Reykjavík sem féllst á lögbannskröfu félagsins um áframhaldandi fréttaflutning DV af málefnum félagsins. DV hefur trúnaðarupplýsingar af fundi félagsins frá 25. febrúar á þessu ári undir höndum.

Lögmaðurinn segir að um sé að ræða ýmis gögn sem tekin hafi verið saman inn í félaginu og sett saman í bláa möppu. Bláa mappan hafi hinsvegar horfið en allar upplýsingar um fundinn sé ekki hægt að nálgast annars staðar en í gögnum úr henni segir lögmaðurinn.

Lögmaðurinn leggur áherslu á að ef upplýsingarnar eru birtar á þessum tíma geti þær bakað fjárfestingafélaginu tjón, einnig Landsbankanum, sem er móðurfélag félagsins, og íslenska ríkinu. DV sé hinsvegar frjálst að birta upplýsingarnar þegar gengið hefur verið frá samningum.

Í ákvörðun sýslumanns segir: „Telja verður að lýsing gerðarbeiðanda [Horns, fjárfestingafélag, innsk.blm.] á þessum fundargögnum í gögnum málsins sé nægjanlega skýr og þau nægilega sérgreind til að leggja megi lögbann á birtingu þeirra."

Þá segir að lögbannið taki nú þegar gildi og er DV gert að skila inn trúnaðarupplýsingunum fyrir hádegi á morgun.

Ritstjórar DV, þeir Reynir Traustason og Jón Trausti Reynisson, sögðu í yfirlýsingu í dag að þeir munu ekki verða við beiðninni og munu því ekki lúta úrskurði Sýslumannsins í Reykjavík.

„Almenningur á fullan rétt á upplýsingum um svo mikilvæg mál sem framferði bankanna í viðskiptum með stærstu fyrirtæki landsins eru. Bankar munu kannski seint læra af hruninu, en það hyggjast fjölmiðlar og almenningur svo sannarlega gera. Ritstjórn DV mun berjast gegn því ranglæti sem við blasir," segir meðal annars í yfirlýsingu feðganna.

Hægt er að lesa úrskurðinn á heimasíðu DV hér.