Lögreglumenn skutu 14 ára dreng

Fimm brasílískir lögreglumenn hafa verið handteknir eftir að myndband sem virðist sýna þá skjóta fjórtán ára gamlan dreng var sýnt í sjónvarpi.

Atvikið var tekið upp á öryggismyndavél í borginni Manaus og sýnir lögreglumennina hrinda drengnum ítrekað áður en þeir skjóta hann nokkrum skotum í brjóstið. Drengurinn lifði árásina af og nýtur nú vitnaverndar ásamt foreldrum sínum.

Atburðurinn átti sér stað í ágúst en hefur ekki komið fram í dagsljósið fyrr en nú því fjölskylda drengsins og maðurinn sem sá um öryggismyndavélarnar óttuðust hefndaraðgerðir frá lögreglunni.