Erlent

Varnarkerfið verulega laskað eftir loftárásir

Jón Hákon Halldórsson skrifar
Bandamenn gerðu loftárásir á Líbíu í kvöld. Mynd/ AFP.
Bandamenn gerðu loftárásir á Líbíu í kvöld. Mynd/ AFP.
Loftvarnarkerfi Líbíu er verulega laskað, segir þjóðaröryggisfulltrúi Bandaríkjanna. Eins og fram hefur komið fyrr í kvöld hafa bandamenn skotið 112 Tomahawk flaugum á hernaðarlega mikilvæg skotmörk í Líbíu.

Obama, forseti Bandaríkjanna, lagði á það áherslu í dag að bandarísk stjórnvöld myndu ekki senda fótgönguliða inn í Líbíu. David Cameron, forsætisráðherra Breta, segir að hugsanir sínar séu hjá þeim hugrökku mönnum sem standi í fremstu víglínu fyrir bandamenn.

Gaddafi og ríkisstjórn hans í Líbíu hefur fordæmt árásirnar og segir að Líbía munu gera árásir á hernaðarleg skotmörk og óbreytta borgara í ríkjum við Miðjarðarhafið. Líbíumenn hafa þegar tekið fjóra blaðamenn höndum. Þar af er einn frá Bretlandi og einn frá Noregi.

Á meðfylgjandi mynd sést þegar einni Tomahawk flauginni er skotið í átt að skotmarki.


Tengdar fréttir

Meðvitaður um hættur hernaðaraðgerðanna

"Ég er meðvitaður um hættur hernaðaraðgerða,” sagði Barack Obama, forseti Bandaríkjanna, í sjónvarpsávarpi í kvöld. Ég vil að ameríska þjóðin viti að beiting valds er ekki fyrsti kostur í stöðunni,“ sagði Barack Obama þegar að hann réttlætti loftárásirnar á Líbíu sem hófust í kvöld. Obama sagði að Gaddafi beitti þjóð sína svo mikillli grimmd að ekki væri hægt að standa hjá og horfa á ofbeldið.

Frakkar senda flugmóðurskip sitt til Líbíu

Franskar herþotur skutu fyrstu skotum á líbísk skotmörk í dag. Þá hefur David Cameron, forsætisráðherra Breta, staðfest að breskar herþotur væru tilbúnar til árásar og bandarískir fjölmiðlar segja að hermenn Bandaríkjamanna hafi skotið stýriflaug.

Bandamenn búa sig undir árásir á Gaddafi

Um 20 herþotur frá franska flughernum sveima nú í líbískri lofthelgi til að koma í veg fyrir að herlið Gaddafis Líbíuforseta geti ráðist á uppreisnarmenn í borginni Benghazi. Þá eru einnig franskar þotur yfir Líbíu.

Cameron segir ekki hægt að sitja aðgerðarlaus

„Það sem við gerum er nauðsynlegt, löglegt og rétt,“ sagði David Cameron forsætisráðherra Bretlands í sjónvarpsávarpi fyrir utan breska forsætisráðherrabústaðinn í dag.

Árásin gæti haft áhrif á olíuverð

Markaðir tóku að róast í lok vikunnar eftir stormasama daga vegna jarðskjálftanna og flóðbylgjunnar í Japan. Stærstu sjö iðnríki í heimi, svokölluð G7 ríki, gripu til aðgerða í fyrsta sinn í áratug. Talið er að þær aðgerðir hafi valdið því að japanska jenið féll um 3% gagnvart bandaríkjadal, úrvalsvísitalan í japan hækkaði um 2,7% og heimsmarkaðsverð á olíutunnunni lækkaði um 0,3%.

Herþota skotin niður

Herþota var skotin niður í borginni Benghazi í Líbíu í nótt þrátt fyrir að ríkisstjórn Líbíu hafi lýst yfir vopnahléi.

Gaddafi með fjóra blaðamenn í haldi

Líbísk stjórnvöld hafa tekið fjóra blaðamenn í gíslingu eftir að árásir bandamanna á Líbíu hófust í dag. Blaðamennirnir starfa allir fyrir Al-Jazeera fréttastofuna. Þeir eru frá Bretlandi, Noregi, Túnis og Márítaníu, að því er Al-Jazeera greinir frá. Blaðamennirnir hafa verið í Líbíu undanfarna daga til þess að greina frá ástandinu þar.

Bandamenn ætla að ráðast á Gaddafi

Loftárásir bandamanna á Líbíu geta hafist á hverri stundu en leiðtogar Evrópu, nokkurra Arabaríkja og utanríkisráðherra Bandaríkjanna ákváðu á fundi í París rétt í þessu að hefja hernaðaraðgerðir.

Hrikalegar myndir af árásinni í Líbíu

David Cameron, forsætisráðherra Breta, Hillary Clinton, utanríkisráðherra Bandaríkjanna, og Nicolas Sarkozy, forseti Frakklands, eru í þann mund að hittast til að ræða stöðuna í Líbíu. Síðar í dag munu þau svo hitta leiðtoga fleiri Evrópuríkja og Arabaríkja til að ræða hernaðaraðgerðir. Þær eru hrikalegar myndirnar sem sýna þegar herþota er skotin niður í borginni Benghazi í Líbíu í nótt. Vélin var á vegum uppreisnarmanna og talið er að það hafi verið hersveitir Gaddafis sem skutu vélina niður.

Mest lesið


Fleiri fréttir

Sjá meira


×

Mest lesið