Capello finnst ekki mikið til FIFA-listans koma

England er einhverra hluta vegna í fjórða sæti á styrkleikalista FIFA þrátt fyrir að hafa ekki átt neitt sérstöku gengi að fagna að undanförnu. Landsliðsþjálfarinn Fabio Capello tekur ekki mikið mark á listanum.

Englendingar hafa unnið aðeins þrjá keppnisleiki síðan að HM í Suður-Afríku lauk síðastliðið sumar en þá féllu þeir úr leik eftir stórt tap gegn Þýskalandi í 16-liða úrslitum.

Enn fremur hefur England ekki unnið síðustu fjóra leiki sína á heimavelli sínum á Wembley og er það versta gengi liðsins á þeim sögufræga stað í þrjá áratugi.

„Ég er ánægður en þetta er bara ein breyta í jöfnunni,“ sagði Capello við enska fjölmiðla. „Þetta er bara þessi stigatafla. Þá er frekar betra að vinna leiki.“

„Holland er í efsta sæti listans. En Hollendingar hafa aldrei fagnað sigri á HM. Þeir hafa þrisvar komist í úrslitaleikinn en tapað þeim öllum. Þeir hafa aðeins einu sinni unnið Evrópumeistaratitil.“

„Við tölum alltaf um Holland sem ein besta knattspyrnuþjóð heimsins. En besta liðið er það sem spilar bestu knattspyrnuna. Hollendingar eru í efsta sæti listans en eiga ekki marga titla.“

Englendingar eru til að mynda fyrir ofan Úrúgvæ, Brasilíu og Argentínu en Spánn er í öðru sæti listans og Þýskaland því þriðja.

Ísland er í 124. sæti og hafa forráðamenn KSÍ lengi gefið í skyn að listinn endurspegli ekki raunverulega getu liðanna.