Skulda hóteli í Boston fimmtán þúsund dali

Sextíu manna hópur starfsmanna Brekkubæjarskóla sem urðu af ferð til Boston þarf að greiða hóteli í borginni rúma 15 þúsund dollara, eða ríflega 1,7 milljónir króna, vegna afpöntunarinnar.

Arnbjörg Stefánsdóttir, skólastjóri Brekkubæjarskóla, segir hópinn hafa ætlað saman í námsferð í vetrarfríi skólans í október. Fengið hafi verið tilboð í flugið frá Iceland Express sem einnig hafi ætlað að útvega hótel.

„En svo drógu þeir það til baka og við þurftum að útvega hótel sjálf. Þetta var ráðstefnuhelgi í Boston og þess vegna lentum við á frekar dýru hóteli,“ segir Arnbjörg.

Um mánuði fyrir brottför tilkynnti Iceland Express svo að ekkert yrði af fluginu til Boston. „Við reyndum að komast með Icelandair en hefðum þá þurft að fara í tveimur lotum og annar hópurinn hefði ekki náð skólaheimsóknum í tvo daga. Þess utan var markmiðið að fara sem heild en ekki í tveimur hópum,“ segir Arnbjörg.

Hópurinn er afar ósáttur. „Við vorum mjög reið út í flugfélagið fyrir að fella flugið niður og veltum fyrir okkur hvort þeir voru búnir að sjá það fyrir þegar þeir allt í einu gátu ekki útvegað okkur hótel,“ útskýrir skólastjórinn.

Fyrirvarinn var of stuttur til að hægt væri að afpanta hótelið sem krafðist þess að fá þrjár af fjórum gistinóttum greiddar. Arnbjörg segir að hver og einn hafi átt að borga jafnvirði tæplega 80 þúsund króna og að hótelið hafi verið alveg ósveigjanlegt.

„Við hótuðum þeim illu umtali á ferðasíðum og þá komu þeir til móts við okkur og við þurfum að borga andvirði einnar nætur,“ segir skólastjórinn. Því þarf hver og einn úr hópnum að greiða 30 þúsund krónur en ekki nærri 80 þúsund.

Ætlunin var að hver og einn sækti um ferðastyrk hjá sínu stéttarfélagi. Engir styrkir fást hins vegar í stöðunni sem nú er uppi. Rætt hefur verið við umboðsmann skuldara, Neytendasamtökin og Kennarasamband Íslands. Iceland Express er ekki bótaskylt nema gagnvart því að endurgreiða fargjöldin.

Greiðslukort Akraneskaupstaðar var trygging fyrir hótelpöntuninni. „Við áttum náttúrlega ekki von á að þurfa að nota kortið í svona ömurlegum tilgangi,“ segir Arnbjörg. Bæjarstjórn Akraness hefur nú samþykkt ósk hennar um að starfsmennirnir fái að endurgreiða bænum hótelreikninginn á þremur til sex mánuðum. gar@frettabladid.is