Eyjólfur: Má búast við breytingum

Eyjólfur Sverrisson hefur ekki útilokað að breyta til í leiknum gegn Danmörku á morgun, bæði hvað varðar leikkerfi og byrjunarlið íslenska U-21 liðsins.

Ísland mætir Danmörku á morgun eftir að hafa tapað fyrstu leikjum sínum á Evrópumeistaramótinu. Liðið verður að vinna stórt til að eiga möguleika á að komast áfram en ljóst er að Danir munu einnig sækja til sigurs í leiknum.

„Þetta verður tvísýnn leikur en Danirnir verða á heimavelli og með fullt af áhorfendum á bak við sig. Ég vil því hvetja okkar leikmenn til að nýta sér það, skemmta sér og sýna sitt rétt andlit."

„Danir halda boltanum vel og eru mikið í stuttu spili. Þeir eru með Eriksen, tíuna á miðjunni og svo Jörgensen úti vinstra megin sem eru báðir mjög hættulegir leikmenn. Þeir eru líka með mjög öflugt lið sem hefur vaxið í þessari keppni. Gegn Hvít-Rússum voru þeir mjög góðir og unnu þann leik í raun sannfærandi."

„Við munum fara yfir allt þetta með leikmönnunum okkar svo að það verði ekkert sem komi þeim á óvart í leiknum."

Eyjólfur breytti í 4-4-2 í leiknum gegn Sviss og útilokar ekki að frekari breytingar verða gerðar fyrir leikinn á morgun.

„Það er allt í stöðunni. Við erum að skoða hvernig leikmannahópurinn er og hvaða leikmenn eru klárir í verkefnið. Þá má því búast við einhverjum breytingum. Við viljum velja þá menn sem eru tilbúnir og spila kerfi sem hentar vel gegn þeim. Við munum nota daginn til að kryfja þeirra leik og svo tökum við ákvörðun annað hvort í kvöld eða í fyrramálið."

Hann segir að Jóhann Berg Gunnarsson verði klár í slaginn á morgun eftir meiðsli og þá kemur Aron Einar Gunnarsson aftur í liðið eftir að hafa tekið út leikbann.

„Aron spilaði gríðarlega vel þann tíma sem hann var inn á gegn Hvíta-Rússlandi og er hann góður karakter fyrir liðið."

Um markmið Íslands fyrir leikinn á morgun segir hann enn það fyrsta gilda - að komast upp úr riðlinum.

„Við eigum enn möguleika á því og við munum ekki missa sjónar af því. Við viljum koma marki á þá sem fyrst en gæti líka vel verið að við skorum fjögur mörk á þá á síðasta korterinu - um leið og við skorum þurfa þeir að opna leikinn því þeir geta ekki leyft sér að tapa. Þetta gæti því orðið mjög opinn og skemmtilegur leikur og verða menn að sýna þolinmæði - við þurfum ekki að vera komnir fjórum mörkum yfir eftir korter."