Umfjöllun: Sárgrætileg niðurstaða eftir glæsilegan sigur

Ísland var ótrúlega nálægt því að komast áfram í undanúrslit á EM U-21 liða í Danmörku í kvöld eftir sigur á heimamönnum, 3-1. Ólympíudraumurinn er þar með úr sögunni. Kolbeinn Sigþórsson, Birkir Bjarnason og Hjörtur Logi Valgarðsson skoruðu mörk Íslands í leiknum sem er nú úr leik á mótinu.

Danir féllu einnig úr leik á mótinu í kvöld og urðu reyndar í neðsta sæti riðilsins. Hvíta-Rússland, Ísland og Danmörk fengu öll þrjú stig í A-riðli en Hvít-Rússar komust áfram á besta markahlutfallinu í innbyrðisviðureignum liðanna þriggja. Sviss vann alla leiki sína í riðlinum og er til alls líklegt á mótinu.

Strákarnir í íslenska U-21 liðinu vissu manna sjálfir best að þeir væru búnir að spila langt undir getu í fyrstu tveimur leikjum liðsins á mótinu sem töpuðust báðir, 2-0.

Þeir gerðu það sem þeir ætluðu sér í kvöld - að sýna sitt rétta andlit, skora mörk og vinna sér inn stig. Það eina sem vantaði upp á var að stíga síðasta skrefið til fulls og komast upp úr riðlinum.

Óhætt er að segja að leikmennirnir hafi gert allt sem í þeirra valdi stóð til að láta drauminn rætast. Þeir gáfu sig allan í leikinn, frá fyrstu mínútu til þeirrar síðustu og börðust til síðasta blóðdropa.

Það yrði hreinlega of langt mál að rekja öll dauðafærin sem leikurinn bauð upp á eins og venjan er í greinum sem þessum. Marktilraunirnar urðu alls 43, samkvæmt opinberri tölfræði UEFA, og þar af hæfðu fimmtán skot markrammann.

Danir skutu oftar á markið og voru örlítið meira með boltann en það segir aðeins hluta sögunnar. Staðreyndin er sú að Ísland spilaði mjög vel í leiknum, þá sérstaklega í síðari hálfleik þar sem liðið komst verðskuldað yfir með mörkum á 58. og 60. mínútu sem lagði grunninn að sigrinum.

Danir áttu líka verðskuldað að skora sitt mark. Þeir áttu fjölda dauðafæra sem annað hvort þeir voru klaufar að nýta sér ekki eða þá að þeir létu Harald Björnsson, sem átti stórleik í íslenska markinu, verja frá sér.

Eggert Gunnþór Jónsson átti með öllu eðlilegu að koma Íslandi yfir á 20. mínútu þegar hann skallaði að marki eftir fyrirgjöf Gylfa Þórs úr aukaspyrnu. En markvörður Dana, Mikkel Andersen, sýndi ótrúleg viðbrögð og náði að blaka boltanum yfir markið.

Danir fengu álíka dauðafæri í fyrri hálfleik er Nicki Bille Nielsen fékk nánast frítt skot í vítateignum, einn gegn Haraldi, en sendi knöttinn fram hjá.

Hafi fyrri hálfleikur verið fjörlegur átti hann ekkert í þann síðari. Kolbeinn kom Íslandi á bragðið með marki af stuttu færi á 58. mínútu eftir þunga íslenska sókn. Tveimur mínútum síðar var Ísland aftur komið í sókn og í þetta sinn skallaði Birkir Bjarnason knöttinn í netið eftir glæsilegan undirbúning Gylfa Þórs.

Þegar þarna var komið þurftu bæði lið að sækja. Danir til að jafna leikinn og Ísland til að skora minnst eitt mark í viðbót - helst tvö. Síðustu 30 mínúturnar eru einhverjar þær ótrúlegustu sem undirritaður hefur orðið vitni að - og var stemningin á vellinum sérstaklega mögnuð. Tæplega tíu þúsund áhorfendur sem tóku þátt í hverri einustu hreyfingu það sem eftir lifði leiksins.

Danir skutu í slána, Kolbeinn skaut í stöng, bæði lið skoruðu rangstöðumörk og Íslendingar heimtuðu víti. Auk þess fengu leikmenn beggja liða fullt, fullt af góðum skotfærum.

Því miður, eftir á að hyggja, áttu Danir eftir að skora. Það kom á 81. mínútu og var Bashkim Kadrii þar að verki með skalla á fjærstöng eftir fyrirgjöf frá hægri.

Staðan því orðin 2-1 og Ísland þurfti enn tvö mörk. Hjörtur Logi Valgarðsson tryggði Íslandi endanlega sigur í leiknum með þrumufleyg sem fór í slánna og inn á 91. mínútu leiksins en það þurfti enn eitt mark til. Því miður kom það ekki.

Það kom svo á daginn að Svisslendingar unnu sinn leik gegn Hvíta-Rússlandi, 3-0, sem þýðir að 3-0 sigur hefði dugað Íslandi til að komast áfram. En allt kom fyrir ekki og gengu bæði lið niðurlút af velli í Álaborg í kvöld. Á meðan fögnuðu bæði liðin í Árósum en þar fór leikurinn fram fyrir nánast tómum velli. Stemningin og fjöldinn var í Álaborg en þar urðu bæði danskir og íslenskir stuðningsmenn að sætta sig við sárgrætilega niðurstöðu.

Íslendingar geta þó huggað sig við sigurinn í kvöld og geta strákarnir gengið stoltir frá borði eftir frammistöðuna í kvöld. Hún verður lengi í minnum höfð.

Ísland - Danmörk 3-1

Dómari: Mazic Milorad, Serbíu.

Skot (á mark): 17-26 (7-8)

Varin skot: Haraldur 7 - Andersen 4

Horn: 4-9

Aukaspyrnur fengnar: 12-13

Rangstöður: 4-4