Leifur: KR með dýrasta lið sögunnar

„KR er náttúrulega með dýrasta knattspyrnulið Íslandssögunnar, það er morgunljóst," segir Leifur Garðarsson, þjálfari Víkinga, í viðtali á stuðningsmannasíðu félagsins vikingur.net.

Víkingar leika í 1. deildinni en leika gegn KR í úrslitaleik Reykjavíkurmótsins sem fram fer á sunnudag.

„Þeir hljóta að teljast sigurstranglegri í þessum úrslitaleik enda með geysilegt mannaval í sínum leikmannahópi," segir Leifur.

„Helsti styrkur KR er auðvitað að þeir eiga 2-3 landsþekkta leikmenn í hverja stöðu. Þeir hafa verið að flytja heim atvinnumenn í bunkum upp á síðkastið og mikið verið að gera hjá flugfrakt TVG Zimsen í því sambandi enda hraðvirkur og hagkvæmur flutningsmáti," segir Leifur í viðtalinu á vikingur.net.