Trésmiðja brann í Sandgerði í nótt

Eldur kviknaði í Trésmiðjunni Mosfell í Sandgerði í nótt og var húsið alelda þegar boð um brunann barst um klukkan tvö í nótt. Húsið er gerónýtt, samkvæmt upplýsingum frá lögreglunni á Suðurnesjum.

Tilkynnt var um eldinn klukkan 1:58 í nótt en mikið af timbri er inn í húsinu. Slökkvistarfi var að mestu lokið klukkan fimm en þó logar enn í glæðunum. Húsið stendur niður við bryggjuna í Sandgerði en engin starfsemi er í húsinu.

Slökkvilið Sandgerðis fékk aðstoð frá Brunavörnum Suðurnesja, og voru þegar mest lét 22 slökkviliðsmenn að berjast við eldinn. Eldsupptök liggja ekki fyrir.