Baulað á leikmann Man Utd af mótmælendum

Oliver Gill, nítján ára leikmaður Manchester United, hefur fengið að kenna á mótmælunum sem standa yfir vegna eignarhalds félagsins. Oliver er sonur David Gill, framkvæmdastjóra félagsins.

Oliver var meðal varamanna í leiknum gegn Fulham um síðustu helgi en baulað var þegar nafn hans var lesið upp af vallarþuli. Þá hefur hann verið áreittur í einhverjum varaliðsleikjum félagsins.

Mótmælunum hefur nefnilega ekki aðeins verið beint að Glazer-fjölskyldunni heldur einnig að David Gill og hann ásakaður um að hugsa meira um eigið veski en velferð félagsins.

Það ber þó að taka fram að minnihluti mótmælenda hefur beint reiði sinni að Oliver Gill sem er varnarmaður fyrir þá sem áhuga hafa.