Hólmar Örn í FH - skrifar undir eftir helgi

Hólmar Örn Rúnarsson hefur ákveðið að ganga í raðir FH en þetta staðfesti hann í samtali við Vísi í dag.

Hólmar Örn hefur leikið með Keflavík undanfarin ár en samningur hans við félagið rann út á dögunum.

Samkvæmt heimildum Vísis gat Hólmar valið um að vera áfram í Keflavík eða að fara annað hvort til FH eða KR.

„Ég ætla ekki að nefna nein félög sem komu til greina hjá mér - ég enda allavega í FH," sagði Hólmar.

„Ég hef komist að samkomulagi um tveggja ára samning og verður væntanlega gengið frá honum eftir helgi."

Hann segir að hann hafi þurft á nýrri áskorun að halda og því ákvað hann að fara í FH. „Ég er búinn að vera lengi suður með sjó, allan minn feril fyrir utan tvö ár í Silkeborg. Það var því kominn tími á að breyta til."

„FH stefnir alltaf á alla titla sem í boði eru rétt eins og í Keflavík. Það verður gaman að fá að taka þátt í þeirri baráttu með FH."

Hólmar Örn hefur verið að skoða þann möguleika að koma sér að hjá félagi erlendis og útilokar ekki að það gæti gerst.

„Ég fæ að hafa þetta opið eitthvað frameftir ef eitthvað meira gerist í þeim málum."

Hólmar á að baki 141 leik með Keflavík í efstu deild og lék alla 22 leiki liðsins í sumar. Hann var á mála hjá Silkeborg í Danmörku frá 2006 til 2008.