Landlæknisembættið verður 250 ára á morgun

Landlæknisembættið fagnar 250 ára afmæli sínu á morgun. Geir Gunnlaugsson landlæknir segir að gríðarlegur árangur hafi náðst í heilbrigðismálum frá því að embættið var stofnað.

Geir segir til dæmis að almenn þekking á sjúkdómum hafi aukist mjög mikið, barnadauði hafi verið sá hæsti hér á landi en sé nú sá lægsti. „Við vorum að kljást við vannæringu en nú erum við að kljást við offitu," segir Geir. Þá hafi fræðsla um fæðingar og brjóstagjöf aukist mjög mikið. Geir segir að mjög mikið hafi breyst á 20. öldinni en jafnframt hafi orðið miklar breytingar á átjándu og nítjándu öld með hratt lækkandi ungbarnadauða. „Ekki allt þökk sé Landlækni, heldur er hann þátttakandi í umræðu og miðlun þekkingar," segir Geir. Hann segir að Íslendingar standi nú frammi fyrir allt öðrum vandamálum en voru þegar að embætti Landlæknis var stofnað. Nú sé það offita, tóbak, tannheilsa og svo sé ört stækkandi hópur eldra fólks sem þurfi stuðning.

Geir segir að forvarnarstarf sé mikilvægt. Til standi að sameining Landlæknis og Lýðheilsustöðvar verði gengin í gegn fyrsta janúar næstkomandi. Jafnframt sé mikilvægt að Landlæknir vinni áfram að því að miðla upplýsingum til stjórnvalda og almennings. Þá þurfi Landlæknir að vera sá aðili í heilbrigðiskerfinu sem hægt sé að leita til með ábendingar og kvartanir. Þá leggur Geir áherslu á meiri þverfaglegri samvinnu Landlæknis við aðra aðila. Það eru mörg verkefni sem blasa við og það þarf að þétta raðirnar. Þannig að það eru næg verkefni framundan, til næstu 250 ára," segir Geir.

Smelltu hér til að fræðast nánar um afmælisdagskrá Landlæknis í tilefni af afmælinu á morgun.