Engu munaði að Qantas risaþotan færist

Flugmenn Qantas þotunnar í Singapore fengu yfir sig heila holskeflu af bilunum eftir að sprenging varð í hreyfli hennar fyrr í þessum mánuði.

Um leið byrjuðu að kvikna aðvörunarljós í stjórnklefanum. Flugmennirnir þurftu alls að takast á við 54 neyðartilfelli meðan þeir voru að snúa vélinni aftur til lendingar í Singapore. Eitt alvarlegasta tilfellið var að eldsneyti fossaði úr geymunum á vængnum þar sem hreyflilinn sprakk. Það varð því fljótlega mikið ójafnvægi á þyngd vængjanna.

Enn alvarlegra var að vegna rafmagnskaplanna sem fóru í sundur var ekki hægt að dæla eldsneyti úr geymum aftan í vélinni sem varð til þess að hún varð afturþung. Það er eitthvað það hættulegasta sem menn geta lent í.

Þegar vélin kom svo loks inn til lendingar kom í ljós að vængbörðin virkuðu ekki og það þurfti því að lenda á miklu meiri hraða en æskilegt var. Bremsurnar voru negldar í botn og hitinn á þeim fór yfir 900 gráður á celsius. Mörg dekk sprungu við þetta en vélin stöðvaðist þó að lokum. Alveg á brautarendanum.