Gunnar Oddsson hefur engan áhuga á að taka við Grindavík

Gunnar Oddsson hefur engan áhuga á að taka við Gríndavík. Hann var orðaður við þjálfarstöðuna í hádegisfréttum Bylgjunnar þar sem forsvarsmenn Grindavíkur neituðu að tjá sig um málið.

Gunnar sagði við Vísi rétt í þessu að hann ætlaði bara að horfa á fótbolta í sumar og fara að veiða, ekki þjálfa neitt félag.

"Ég er í fríi frá fótbolta og verð það í allt sumar, ég þarf aðeins að hlaða batteríin."

Milan Stefán Jankovic mun stýra æfingu hjá Grindavík í kvöld en samkvæmt heimildum fréttastofu vilja Grindvíkingar ganga frá sínum málum sem allra fyrst, helst í dag.

Milan Stefán sagði við Vísi áðan að hann hefði heldur ekki áhuga á að taka við liðinu. "Ég vil það ekki, en það er sjálfsagt að hjálpa til," sagði þjálfarinn sem ætlar að vera áfram hjá félaginu sama hver er ráðinn.