Hodgson vill að Torres fái frí frá landsliðinu

Roy Hodgson vonast eftir því að Fernando Torres leiki ekki með spænska landsliðinu sem mætir Liechtenstein á föstudaginn. Hann hefur biðlað til Vicente Del Bosque, þjálfara Spánar, að gefa Torres frí.

Torres fór tvívegis í uppskurð á hné í lok síðustu leiktíðar og fann sig ekki vel á heimsmeistaramótinu í sumar þó Spánn hafi staðið uppi sem sigurvegari.

„Hann byrjaði undirbúningstímabilið síðar en aðrir. Hann er enn á endurhæfingarstigi og er ekki kominn í sitt besta form. Hann er leikhæfur en þarf að fara varlega," segir Hodgson.

Torres lék í 89 mínútur í gær þegar Liverpool vann WBA og skoraði sigurmark leiksins á laglegan hátt.