Úrvalsdeildarliðin komust áfram í deildabikarnum

Þrír leikir fóru fram í 2. umferð ensku deildabikarkeppninnar í kvöld þar sem þrjú úrvalsdeildarlið voru í eldlínunni.

Everton vann 5-1 sigur á Huddersfield þar sem að Jóhannes Karl Guðjónsson lék allan leikinn á miðju síðarnefnda liðsins.

Marouane Fellaini, Jack Rodwell, Jermaine Beckford, Louis Saha og Leon Osman skoruðu mörk Everton í leiknum en mark Huddersfield var sjálfsmark Johnny Heitinga.

Þá vann Newcastle 3-2 sigur á Accrington á útivelli. Ryan Taylor, Shola Ameobi og Peter Lovenkrands skoruðu mörk Newcastle í leiknum.

Þá vann Fulham öruggan 6-0 sigur á Port Vale. Zoltan Gera og Bobby Zamora skoruðu tvö mörk hvor og þeir Moussa Dembele og Clint Dempsey hvor sitt markið.